點解佢仲唔娶我?

by 哈哈 October 2011 
最近閃婚熱潮吹襲娛樂圈,女星們紛紛脫離敗犬行列,下嫁速度媲美1000M光纖寬頻。你可能會諗,人哋話晒係明星,樣靚身材好兼事業有成,之前揀耐咗所以遲咗嫁囉……咁你呢?

結婚始終係兩個人嘅事,你揀人時人揀你,遲遲未婚一定有因。與其歸咎佢唔夠完美,不如先檢視自己。有美國matchmaking專家最近總結咗嫁杏無期四因。如果你同男友拖咗好耐仲未check in,恐怕你已經犯咗以下毛病。
 

結婚始終係兩個人嘅事,你揀人時人揀你,遲遲未婚一定有因。

1.     幫佢搵藉口
筆者身邊有唔少男性友人同女友拍拖好幾年(有pair仲買埋樓),女方以為定過抬油,點知最終分手不特止,男方不出兩年已經另娶他人,友人受盡指責下說:「由頭到尾冇講過要同佢結婚。」站在女性立場,當然表示同情女方,但「冇講過」確實又係重點。男人言行比女人直接簡單。如果男方從未表態,勸閣下停止再幫佢搵藉口,甚麼「佢想先建立事業基礎」、「佢好忙」、「佢未定性」……一般男人喺開始一段關係不久,就知對方係咪自己想娶嘅「唯一」(Gigi老公相識兩個月即求婚就係實證)。與其等無可等到發爛逼婚致分手收場,不如珍惜青春,不要做佢搵馬期間的那隻「牛」了。

2.     作賤自己
單身女普遍犯下嘅滔天大罪,就係唔尊重自己:以為棄守自家原則,盡量滿足男人所需,就可以坐定粒六等收婚戒。其實,自古男人心目中嘅完美女神一不離二:平日溫柔體貼、床上風騷入骨……那只係社會媒體多年來塑造嘅虛疑女性形象。女人具有某種獨特個性,比他幻想的來得更有吸引力,更有驚喜,更想永遠擁有。專家建議姊妹們別以性事維持一段關係,到頭來只會導致閃分。

3.     自欺欺人
單身配對專家累積多年經驗,發現一個絕無例外嘅情況:當男友向女友提及「婚姻會破壞一段關係」、「我唔相信婚姻」、「都唔明啲人仲乜要結婚」等等不婚言論時──佢真係冇打算(同你)結婚。如果男人早已有結婚嘅打算,就唔會講埋呢啲會令女人失去信心嘅說話,唔通博求婚失敗攞黎燸咩?男人真心想與你長相廝守,每次佢望住你嗰陣,你會發現佢眼裡流露出一種猶如小狗望見零食一樣的「愛意」。假若你跟他拍拖多年不止一次聽到佢發表不婚言論,亦冇時刻流露「愛的眼神」,相信係時候停止自欺欺人了。

4.     欠缺自信
大部份男人都喜歡有自信、獨立自主嘅女人,hidden agenda就係冇咁大責任感,壓力少啲,相處時都輕鬆啲。不過有唔少女生,尤其係港女一族,卻往往過份依賴對方,不自覺的做咗男人口中嘅「黐身膏藥」;當纏人形象一建立,可能已難令男人娶得安心。信心唔單止要表現俾男人睇,更重要係用來善待自己。專家話,如果佢冇表示要同你結婚,而你又唔係不婚主義者的話,建議盡快落車。你自信散發出嘅光芒,將會吸引一個真正想與你廝守終生嘅男人。

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s